Epigramma αὐτόγραφον Rodolphi Collini vitam eius complectens:

(1) Gundelii natus. (2) Studiosus. (3) Restio. (4) Miles.

(5) Mox Tiguri civis, (6) deinde professor eram.

(7) Nunc quoque in extremis, qualis mecumque manet sors;

Sors haec in manibus stat, Deus alme, tuis.

Epigrammatis explicatio

1.1 Gundelii natus

Gundelium (Gundenlingen) vicus est in agro Lucernensi sub comitatu Rotenburgensi in medio itineris inter Lucernam et Beronam. In ditionem Lucernensium venit una cum arce Rotenburgo, quae capta est a Lucernensibus anno 1385, festo die innocentium puerorum, cum ipse comes Rotenburgensis in parrochia sua, quae extra arcem et oppidulum in propinquo sita est, rebus divinis interesset, et arcem suam incendio flagrantem respiciens fugam capere cogeretur ex ipso templo, rebus omnibus omissis et amissis.

Mox anno ante pugnam ad Sempach commissam, Gundelium ab Austriacis incendio funditus vastatum est. Ibi eius incolae ad sylvam proximam Lucernam versus confugerunt ibique cum iumentis et hominibus consederunt. Atque in colle, qui adhuc dicitur Z’huben, id est zum Bül, speculam habebant, unde prospectantes hostium turmas advenire; signo cornu dato, ex agris, quos armati colere cogebantur, concurrebant hostesque profligabant. Ab eo ipso colle mei maiores nomen adepti sunt, ut dicantur Zum Bül vel Am Bül vel Bülmanni. Nam his nominibus hodie indifferenter nominantur. Ego in adolescentia me Clivanum a clivo, deinde Collinum a colle denominavi.

Natus sum parentibus rusticanis, honestis et satis locupletibus; solis enim paternis sumptibus liberaliter sustentatus sum. Pater dictus est vulgo der Althans von Gundenlingen. Mater dicta est Elsbeth Kellerin von Seesatt. Est autem Seesatt villa praeclara ad lacum Sempachium, quam mei a fratre nepotes adhuc possident. Sacro baptismate initiatus sum in vico Nuewdorff prope Beronam. Nam pastor in Römerschwil, quo Gundelinenses ad sacra et busta pertinent, peregere aberat. Ab ipso certe matris utero statim peregrinari mihi in fatis erat. Susceptor e sacro baptismate fuit Rudolff Kauffmann, civis in Sempach, artis veterinariae insignis medicus. Susceptrix fuit mater familias in Oberbuchen, quae villa in confinio paterni ruris sita est. Ea bona matrona sacri baptismatis tesseram meis parentibus quotannis mittere solebat, etiam me peregre agente et literis operam dante. Id munusculi apud Gundelienses vocatur die Osteren, apud Tigurinos der Zimpeltag.

Natalem diem certo mater mea narrare non potuit, sed me in lucem editum dixit in septimana pascali (in der Osterwuchen) anno 1499, quo tempore Suevicum bellum flagrabat, et pater meus in armis erat iuxta Rhenum in vico Kobeltz, id est Confluentiae, ubi Helvetii praesidium contra Suevos trans Rhenanos habebant.

2. Studiosus

Primum anno aetatis octavo a Patre Beronam deductus, ubi praeceptore Domino Magistro Andrea Erni, insigni musico, et hospite Domino Jacobo a Zell octogenario et religioso sacerdote usus fui; per biennium cum magna praeceptoris et hospitis spe, et mei erga meos commendatione.

Secundo Luceriam traductus, in familiam Domini Johannis Buchholzer, praepositi Lucernensis, qui mihi magnus avunculus fuerat, susceptus sum; apud quem commoratus ad quinquennium et variis usus praeceptoribus, viris quidem bonis sed nil nisi cantare peritis. Magnamque studiorum iacturam fecissem, imo ad frugem bonam nunquam evasissem, nisi Dominus Magister Joannes Xylotectus, Lucernensis et Beronensis Canonicus, patritio genere ortus, qui postea anno 1526 die 8 Augusti Basileae peste obiit, patria eiectus propter religionem, qui patriae et religionis unicum decus fuerat, mihi privatim Vergilium praelegisset. Is pro sua summa humanitate primam Vergilii Eclogam mihi interpretatus est, quam etiam cum avide percepissem, statim meo marte Eclogam scripsi; qua de re vir optimus delectatus, reliquas Eclogas et quatuor Georgicorum, item tres Aeneidos libros mihi praelegit, et cum ad ultimum tertii libri versum pervenisset, qui ita habet: «Conticuit tandem factoque hic fine quievit»,2 eum versum sibi applicavit, quasi et ipse iam conticescere et facto fine quiescere vellet. Proinde me admonuit, ut propria Minerva poetas legerem, quod studiose foeliciterque feci, adeo ut sex integros libros Aeneidos, item Georgica et Eclogas omnes ad unguem3 edidicerim et recitare promptissime possem. Totus itaque Domino Xylotecto duce Vergilianus factus, caeteros poetas, qui alterius essent notae, facile intelligebam aut fastidiebam.

Tertio Basileam deductus ab ipso D(omino) Xylotecto, in scolam et contubernium D(omini) Heinrici Glariani, praeceptoris omnium fidelissimi, receptus sum, apud quam semestri spatio versatus, mathematices principia percepi, magnum studiorum profectum facturus, si diutius eius doctrina et disciplina frui licuisset. Sed D(omino) Glareano Lutetiam profecto, mihi locus quoque studiorum mutandus erat.

Quarto Viennam me contuli poetices studio adductus. Quo cum venissem, ab adolescentibus Helveticis humanissime exceptus, praesertim a Conrado Grebelio, in contubernium receptus sum. D(omino) D(octore) Joachimo Wadiano patrono et praeceptore usus sum. Spe tamen mea frustratus meram inveni barbariem. Lectiones poeticas (quarum gratia me illuc contuleram) plane pueriles mihi videbantur, qui Vergilio iam olim Lucernae sub D(omino) Xylotecto assuetus fueram. Multa tamen opera magnifica illic, et praesertim Caesaris Maximiliani funus amplissimum vidi. Nec lectiones tantum, sed mores etiam hominum tam prophanorum quam studiosorum mihi displicuere, qui illaudabili ebrietate corrupti erant plerique omnes. Ego certe, qui Beronae et Lucernae musices artem et usum mediocriter perceperam, propter cantorum immanem ebrietatem, musicae et cantionibus ita renunciavi, ut postea ad id laudabile studium nunquam me contulerim. Atque Domino Doctore Vadiano in patriam digresso, ego quoque ulterius illic haerere nolui, non deficiente crumena sed biennio exacto in patriam reversus sum.

«Italiam, Italiam» primus conclamat Achates4

Quinto anno 1519, cum pestis per Galliam et totam Germaniam grassaretur et ego me Tiguri per aestatem continerem, inter Iohannem Iacobum Ammianum, qui ex Gallia venerat, et me conventum fuerat Italiam visere et Bononiam petere, ea itaque conditione digressi, ego me in patriam Gundelium recepi, Ammiano Tiguri remanente. Interim Ammianus iter in Italiam ingressus est, tali occasione oblata. Magnificus Senatus Tigurinus aediles suos tam senatorios quam plebeios Mediolanum mittebat, ut de turribus in arce Mediolanensi constitutis specimen caperent, quo ad earundem turrium formam Tiguri turrim aedificarent, quod postea factum est, turri ista nova et rotunda am Rennwäg aedificata. Cum his Tigurinorum legatis Ammianus Mediolanum venit atque eam urbem, quam tum Franciscus, Gallorum Rex, obtinebat, viris doctissimis exornatam invenit. Bononiam autem nulla eruditione, nisi iure canonico florere percepit. Ergo Mediolani resedit et me quoque illuc evocavit.

Kalendis igitur Ianuariis anno 1520 Mediolanum veni et exoptatissima quaeque inveni. Ab Ammiano fraterne exceptus et ad communia studia vitaeque conditionem contubernalis receptus. Praeceptorem domesticum habuimus Dominum Antonium Thylesium, virum sanctissimum, Graecae Latinaeque linguae peritissimum et historiarum publicum professorem; qui vir optimus, cum ipsum, quot noctibus cubitum iturus, salutarem, iis me votibus resalutabat: «Vale bene, fili, et ora, ora!». Item praeceptorem habuimus Stephanum Nigrum, publicum Graecarum literarum professorem, cuius translationes etiam nunc a doctissimis viris valde probantur. Item Ludovicum Coelium, utriusque linguae professorem etiam hodie, propter suas Antiquarum Lectionum lucubrationes celeberrimum. Horum lectionibus et consuetudine frui licebat quotidie; nec nos nostro officio, quantum ad vitae honestatem et studiorum assiduitatem, defuimus. Ita fiebat ut mirifice apud Helvetiorum primores, qui Mediolanum ventitabant, commendaremur, cum a nostris praeceptoribus tum ab aliis civibus nobilissimis, quorum e numero fuit Ioannes Iacobus Trivultius et Rhenatus Biragus, nostri apud Dominum Thylesium condiscipuli.

Eius rei referam exemplum Germanice, quo melius intelligatur: Herr Wernher von Meggen/ Ritter und hernach Schultheß zu Lucern/ hat einmal zu Meyland mich heimgsucht/ und von mir grosses Lob ghört/ dann ich ward was/ etc. weliches er hernach zu Lucern ußgspreittet/ dermassen/ daß fill Rhadtsherren meinen Vatter gern bekent hetend/ etc. Deßhalb hat einmal der N. Pfiffer/ (ein Rahdtsherr) welicher meinen Vatter wol bekent/ ihn (meinen Vatter) uff der Rüßbrugg fründtlich angeredt/ und uffenthalten/ und zu den Herren/ so herumb warend/ gesprochen: «Lieben Herren/ das ist der Bur/ der so ein gelerten Sun zu Meyland hat.» Weliches min Vatter gar wol gfroüwt/ und es miner Muter daheimb mit grossen Froüden gseitt hat.

Cum in medio cursu studiorum essemus, bellum Mediolanense natum est, quo Mediolanum iterum in manus Imperatoris venit. Quando tam bonarum literarum studia quam cetera eius urbis ornamenta perierunt; iuxta proverbium, quo ipsi Mediolanenses vulgo utuntur, dicentes: Mediolanum sub Rege Gallorum esse civitatem, sub Imperatore esse pagum. In patriam igitur redire coacti sumus sesquianno exacto. Ego in reditu Amianum trans montem S. Gotthardi traxi et portavi.

Sexto. Rursus ex Italia in patriam redux, ne otiosus Lucernae per pontes et plateas deambularem aut in agro paterno inter agricolas opus facientes iners desiderem, consarcinatis libellis optimis et portatu facillimis Basileam proficisci institui, conditionem aliquam literariam quaesiturus; atque in eo itinere, comitantibus quibusdam sacrificulis, bonis sociis, ad monasterium Sancti Urbani diverti. Ubi Melchior Macrinus (meus olim Basileae apud Dominum Glareanum contubernalis) ludimagister fuerat, tunc in patriam Salodurum scriba curiae vocatus. In eius ego locum suffectus et commodissimam studiorum occasionem nactus, ludimagister ibidem constitutus sum, plus biennio ibi commoratus. Cumque meo officio bona fide et verecunde fungerer, Domino Abbati Erhardo Castlero a Keiserstul, nobili genere nato reliquisque monachis charus acceptusque fui. Non enim solis literis incumbens, sed etiam interdum venationis et peregrinationis particeps, me illorum voluntati, salva honestate officiique mei functione, accommodare solebam. Unde fiebat ut me diligerent plurimique facerent nec Beronam migrare paterentur, quamvis, dum apud eos commorarer, canonicatum Beronae assecutus essem, cuius iam olim Expectans (ut dicitur) factus fueram, quod ex literis his liquet:

Copy von der Wart zu Munster:

Wir Schultheß und Rhadt der Statt Lucern thund kund allermenklichem und bekennend offentlich mit disem Brieff/ daß auf Siner Date/ als wir in Rhadtswyß by einandern versampt/ for uns erschinnen ist/ der Erwirdig/ Wolglert Herr Johann Buchholzer/ Bropst des Wirdigen Stiffts Sancti Leodigarii ze Lucern uff dem Hoff/ unser günstiger lieber Herr/ und batt uns ernstlich/ daß wir sinem anerbornen Vetter/ Rudolff zum Bül/ gnediklich geruchen/ und verlichen ein Wart uff ein Corherrenpfrund ze Münster im Ergöw/ als wir dann des wol Macht hettend. Also habend wir angsehen sin flissig Bitt/ auch guten und getrüwen dienste/ so sin Erwirde uns erzeigt und bewysen hat und noch thun mag/ und daruff demselben Rudolffen zum Bül ein Wart gelichen und gnediklich zugeseitt haben/ lyhend und versprechend Im die in krafft dis Brieffs/ also wann fürhin ein Corherr zu Münster abstirbt/ und ein Pfrund ledig wirt/ das denn der gemelt Rudolff zum Bül/ als ein ander Warter nach Sitt und Gewohnheit/ derselben Stifft angan. Doch daß er sich fromklich und erbarlich halten/ und zu priesterlicher Wirde schicken/ auch das die Zyt erhoüscht Priester werde. Und wo er sölichs nit thäte/ über kurz oder lang/ daß dann sölchs unser Lähen und Gnad krafftloß/ hin und ab sin soll: auch vorbehalten/ daß alle die so for dem gemelten Rudolffen zum Bül mit Warten begabet sind/ innhalt ihrer Brieffen forgan söllend/ bis daß es nach Ußwysung unsers Lähenbuchs, darin die Warten gschriben stand/ an inn kompt/ und deß zu Urkund habend wir disen Brieff mit unser Statt Secretinsigel besiglet und gäben auf Frytag an St. Oswalds tag/ als man zalt nach der Geburt Christi Fünfzehen Hundert und im Vierzehenden Iar.

Eo tempore ordo Expectantium ad me pervenerat et canonicatus mihi cesserat, ut ex his patet literis:

Copij von der verfallnen Corherren Pfrund:

Den eerwirdigen geistlichen und wolgelerten Herren Bropst und Capitel/ der wirdigen Gstifft zu Münster im Ergöw/ minen insonders gunstigen lieben Herren Embüt Ich Jacob von Hertenstein/ diser Zyt Schultheß zu Lucern/ min früntlich Dienst und alles das ich liebs und guts vermag zevor. Nach dem dann der wirdig und geistlich Herr Niclaus von Winckel/ Wyland Corherr zu Münster im Ergow mit Tod abgangen/ und dieselbig Pfrund dardurch ledig worden ist/ welicher Pfrund min gnadig Herren und Rhadt der Statt Lucern rächte nominatores und Lähenherren sind/ habend dieselben min gnadig Herren/ dem Ersamen Rudolffen zum Bül voran umb Gottes/ auch sin und siner Fründen flißig Bitt und Dienst willen/ sunderlich angsehen die vereert Wart/ so er in gschrifft inn verschinnen Jaaren/ vor minen gnedigen Herren gegäben / mit obgemelter Corherrenpfrund begabet/ wie dann sie forhar anderen auch gethan haben/ das ich üch in genanter miner gnedigen Herren namen sölcher gstalt verkünden/ und so aber die Form und Billikeit uff im hat/ söllich als geistlich von üwer erwird/ oder den jenen si sölichs besilcht zuvollstrecken und Investieren zeverenden/ so praesentieren und übersenden ich den forgenanten Rudolffen zum Bül/ Inn wie recht ist/ mit Bit und Begär/ Ir wöllind inn uff forgemelte Pfrund/ an des gedachten Statt investieren und bestetigen/ und alles das zethun so wyter darzu ghört und notürfftig ist: Als ich in Namen miner gnedigen Herren obgemelt/ deß gwüßlich zu üch versich und getruw. Zu urkund so hab ich min eigen Insigel ghenkt an disen Brieff/ der geben ist uff Frytag Sant Ambrosius tag/ nach Christi Geburt unsers Behalters Zwentzig und Zwey Jahr.

Circa id tempus Beronae inauguratus sum magna solemnitate ceremoniis pro more adhibitis. Ubi diploma mihi traditum est a Domino Praeposito M. Ulricho Marti, quo canonicatus mihi sancte et religiose confirmabatur. Quamvis iam Canonicus essem et Beronae laute beateque viverem potuissem, apud S. Urbanum tamen remanebam et residentiam (ut vocant) de die in diem differebam, D(omino) Abbate patrocinante et scholae suae necessitatem praetexente.

Tandem cum pater meus decessisset et Dominus Abbas graviter aegrotans medicos sectaretur, Vitoduri apud Iudaeum haerens; ibi tum turbae de Luteranismo per monachum Schultheiß Hugen fratrem concitatae fuerunt, quae senatores Lucerna elicuerunt. Hi ut primum venissent, cognitionem de Luteranismo habentes, omnes omnium libros inspiciunt et cum meos inspexissent Graecis characteribus exsculptos, Hanß Glestig Senator exclamavit: «Isti libri sunt Luterani!» At me negante dixit: «Was kritzis kretzis ist das, das ist Lutherisch.» Libros itaque meos Graecos convasantes Lucernam abduci iusserunt, ut illic coram senatu causam agerem librosque meos reposcerem. Missi fuerunt ad S. Urbanum ex utroque senatu viri circiter viginti, quorum coryphaei erant Hanß Hug Schultheiß, Rudolff Hünenberg, Hanß Glestig Senatores omnium Lucernensium ea tempestate habiti disertissimi. Lucernam cum venissem senatus extraordinarie coactus est in coenobio Franciscanorum mei gratia. Ibi per Wernherum Buchholzer Canonicum et Custodem Collegii Lucernensis, cognatum meum, causam egi. Senatores placidissime mecum egerunt, per alterum Consulem (ut puto Golderum) librosque omnes recipere iusserunt, rogantes et exhortantes multis, ne quid novi adversus antiquam, veram et indubitatam religionem moliri velim, sed maiores meos imitatus, «bonus Christianus et Lucernanus» esse pergerem. Ibi tum Schultheiß Hug clare et proterve dixit: «Ob er wölle, gange er gen Zürich, luge, ob im der Zwingli ein Chorherrenpfrund gebe.» Ea vox mihi peracerba tum videbatur, quam postea auspicatam divinationem fuisse reipsa expertus sum.

3. Restio

Causas commemorare, quae me ad restim adegerint, supersedeo, sed actionem ipsam, ut olim consignavi, hic adscribam simpliciter.

Anno 1524 die 14. Februarii reliqui patriam et sub vesperam Tigurum veniens in aedes Domini Myconii divertebam, ubi res iucunda mihi accidit. Erant «Festa Bacchanalia» (es was an der Alten Faßnacht) et mensa lautissimis epulis (ut fit) ac plenis poculis instructa in vaporario stabat, penes nullus hominum vel sedebat vel astabat, fores aedium apertae fuerunt. In causa fuit, quod convivae omnes ad ad moenia avolarant, ut prospicerent ignes et faces Bacchanales vel Martiales, die Faßnacht- oder Merzenfeur. Nam Dominus Myconius tunc in domo quadam iuxta officinam bombardarum habitabat. Ego ingressus vaporarium solitudinem admirabar, ad mensam assedi, sedem Domini Myconii occupavi, donec homines advenirent, expectavi. Ignibus evanescentibus revolarunt omnes, me invenerunt mensae assidentem, pocula ipsis quasi advenis porrigentem obstupuere omnes. Ibi ego exclamavi: «Domine Myconi, in rem lautam veni bonis avibus.» Dominus Myconius summa hilaritate affectus me humanissime excepit. Domini Myconii hospitio simulque Aremundi Galli Equitis sodalitio aliquantisper usus ad cognatos meos Dominum Wernherum Buchholzer eiusque sororem Lucernam diploma illud, quod mihi a Domino Praeposito Beronensi traditum fuerat confirmandi Canonicatus gratia, remisi ipsumque Canonicatum resignavi ultro et libere, omnibus meis amicis et familiaribus, qui tum Tiguri erant, dissuadentibus.

Cognatos per literas rogavi ut Senatui Lucernensi gratias agerent, quoniam Viennam, non Constantiam petiturus essem. Ab ipsis enim ea spe et conditione discesseram, quasi per integrum ieiunii tempus Constantiae permansurus forem ut sacris ordinibus initiarer. Post aliquot dies Dominus Heinrichus Buchterus Kilchpergam me vocavit ut operam Graecis literis una navaremus. Ubi ferme deprehensus fueram a Domino Wernhero Buchholzer, cognato meo, qui me Constantiae et Tiguri quaesierat et in reditu a via equestri aberrans Kilchpergam delatus fuerat. Circa Kalendas Maias aquis medicatis in Urdorff usus sum. Ubi curata cute membrisque refocillatis, Tigurum reversus, die 23 Maii, artificium restionarium tractare, in nomine Domini Jhesu Christi aggressus sum apud Heinricum Ostertag restionem honestum et ordinis senatorii virum. Cui pro mercede artis spopondi et in promptu persolvi 18 aureos. Atque brevi tantum profectum in disciplina restionaria perfeci, fretus fideli institutione mei magistri, ut nemini restionum solertia et alacritate facile cessissem.

ὢ παλάμαι βροτῶν5

4. Miles

Eodem anno nempe 1524 die 3 Octobris cum manipulo civium Tigurinorum ad Waltzhut in subsidium eius oppidi profectus sum, functus officio militis et scribae, bis enim ad Senatum Tigurinum scripsi. Primum ex pago Dielstorff. Ubi viator publicus prandentes nos offendit et iussu Senatus interrogat, quonam locorum profecturi simus, quidve gesturi. Milites exterriti et dubii, quidnam responsi darent, varias dicebant sententias. Quas viator respuebat et dicebat: «Habetis hic scribam» (me digito ostendens), «huic demandate ut vestram scribat sententiam, quoniam ex scripto, non ex ore responsum Senatui referre volo.» Milites ergo orantes et supplicantes scriptionem a me impetrant. Ego itaque nonnulla ex militum sententia, nonnulla de meo cum scripsissem, in scamnum insiliens, militariter facto silentio, quas scripseram literas, publice legi, quibus lectis omnes ita inflammati sunt, ut mortem potius obire quam Tigurum redire vellent. His literis in Senatu Tiguri lectis, Senatores tantopere commoti sunt ut nonnulli ne lachrymis quidem cohibitis censerent, tumultuarium militem conscribendum, qui nos observaret et, si necesse esset, iacta alea auxilio adiuvaret. Nonnullis autem visum est legatos e Senatu ad nos mittendos, qui rem compertam ad Senatum integram referrent. Ea sententia praevaluit. Missi sunt e tribunis M. Hans Wägman, ein Gerwer, M. Thoman Meyer, ein Schumacher. Ibi tum ego secundo scripsi ad Senatum Tigurinum, ex concione publica, quae in curia Walzhutensi a nobis habita fuerat. Multa nocte ad oppidum venimus, hospitio usi Junghansen Schallers, qui nos Tiguro eduxerat. Octavo die, cum nihil operae pretium ageretur et ingens concursus militum fieret, ego quibuscum illuc profectus fueram, Senatu Walzhutensi hospiteque nostro salutatis, Tigurum reversus sum, nec a duce Clausen Keller von Bülach nec a signifero Hansen Habersaat Tigurino persuaderi mihi patiebar ut in armis remanerem. Ergo res mihi ad restim rediit. In multorum tamen civium notitiam et amicitiam propter binas illas scriptiones perveni. Et Mecoenates mei, quibus insciis militiam subieram et quorum offensam metuebam, maiori quam antea studio me amplectebantur.

Anno 1525 Kalendis Ianuariis institui profectionem ad Ducem Ulrichum Wirtenbergensem, quem Mompelgardiae quaesiturus eram, sed in Walzhut inveni eius Legatum Dominum Ioannem Fuchssteiner, eadem illa tractantem, quae ego ad Ducem relaturus eram. Saloduri Ducem conveni collocutusque sum ex consiliis mihi commissis de ducatu recuperando. In ea profectione Dominum Ioannem Frumentarium, Ducis cancellarium, amicum mihi comparavi intimum ac deinceps semper coniunctissimum. Non ita multo post Scaphusiam profectus sum, consilia de bello incipiendo, de ducibus eligendis, de concionatore publico habendo ad Ducem deferens. Februarii die 13 arma sumpsi, nomen Duci dedi, in aulam receptus sum, Scaphusiae commoratus. Tigurum eques ducentos aureos advexi, quos Dux commodato acceperat a Laurentio Zur Eich laniatore; item 8 aureos dedi Ioanni Hager typographo pro literis ad civitates imperiales impressis. Caeterum de re bellica, inter cives suscipienda, nihil tractare volui, quia Tiguri lege cautum erat ea de re.

Priusquam nomen Duci darem manu missus eram a magistro meo restione, id cavens ut liber a servitio omnique ministerio quorsum libuisset, abire possem, nulli servituti obnoxius; utque in posterum ea militia mihi fraudi non esset, si quando ius civitatis empturus forem.

Antequam abirem in bellum, cum aulicis in arcem Hochentwiel ascendi diesque aliquot inibi moratus, tandem armatus ad Helvetiorum milites in pagum Hültzingen descendi. Primum apud eos, qui curam bombardarum habebant, deinde apud satellites, custodes corporis Ducis, postea apud equites et nobiles aulicos contubernium habui.

Primo oppidum Balingen deditione facta receptum est, ubi contubernium sortitus sum apud anum quandam, cuius opes domesticae militari more dilapidabantur. Illa modestiam meam considerans ad lectum, in quo graviter morbo et senio confecta decumbebat, advocabat et perhumaniter salutabat ad hunc modum: Biß mir willkomm min werder Gast. Deinde addebat mandata quaedam pia et religiosa, memori quae mente tenebo.

Non procul a Balingen pars militum, cohors quae constabat ex rusticis ab Hercinia silva collectis et sensim ab Helveticis castra habebat, ab hostium equitibus caesa est.

Apud Balingen pars militum turpiter et foede ducem deseruit, maior tamen pars in militia perseverans, cum Duce ad Herrenberg perrexit. Non procul inde hostium peditatus et equitatus apparuit et acies utrinque instructae ad pugnam procedebant. Equitatus a tergo nos circum venerat, sed peditibus subterfugientibus pugnam etiam equites retrocesserunt. Itaque pugnatum non est. Illic in praeludio pugnae equus viri nobilis N. a Sperwerseck globo ictus ante Ducem et me corruit.

Ad metropolim Stutgardiam totis viribus Dux contendit et suburbio potitus est. Ibi ego sicarium mea manu cepi, armisque spoliavi, bombarda scilicet et gladio; qui tamen nocte proxima per satellitum ebrietatem et incuriam evasit. Bombardam ego pro opimis spoliis Tigurum deportavi diuque ea usus sum.

Cum iamiam Stutgardiae expugnatio in manibus foret et populus Wirtenbergensis undique ad Ducem conflueret ac ultro deditionem faceret, ibi tum (turpe quidem dictu) defectio (imo proditio, ut Dux ipse palam vocabat) patrata est. Cuius author fuit Onophrius Setzstab. Quem ego pro concione publica, quae tympano et praecone convocata erat, audivi meis auribus defectionem et fugam suadentem, duabus de causis, quarum una erat inopia stipendii, altera Helvetiorum revocatio. Aiebat enim, imo proclamabat se simul omnes deceptos esse vana pollicitatione et iniqua frustratione stipendii. Item se simul omnes revocari domum a communi conventu Helvetiorum, quibus nisi obtemperassent, fore ut ipsi foris exilii damnarentur et ut domi communis patria ab Austriacis, haereditariis hostibus, cruento bello infestaretur. Proinde sibi ipsis et patriae consulendum esse. His addebat alia acerbissima dicta, quibus milites ad defectionem adduxit.

Militibus ad defectionem adductis et fugam tumultuose adornantibus, Dux quoque idem facere coactus est. Et nocte adhuc alta fugam inivit me pedestri cursu equi cursum adaequante hoc modo: Als hefftig der Hertzog ritt, als hefftig luff ich, diser gestalt: Ich hat min Hand auf des Herzogen Stägreiff. Duce ita iubente, ex quo facile cursum equi consequebar ad bonam diei partem. Post fugam a Stutgardia cum Duce Rotwilam veni, ubi post prandium in Ducis conclave ingressus ab eo familiariter appellabar: Mein Rudolwff, wie stehts? Ego temere respondebam: Wol, Gnädiger Herr. Ipse subdidit: Es steht taussig Teuffel. Nam ad fugam se denuo praeparabat, in sylvam quandam abiturus, donec milites diffluxissent, qui stipendium per vim habere volebant.

A Rotwila Ducem Scaphusiam usque comitatus, eo iubente et negotii quiddam iniungente Tigurum petii, inde in Rhetiam digressus ad D. Iodocum Kilchmeyer, cognatum meum, Tigurumque regressus offendi literas, quibus ad arcem Hohentwiel vocabar. Ubi per aliquot menses in praesidio arcis moram trahens et aulicae et militaris vitae pertaesus militiae detrectandae occasionem nactus sum a bello rusticorum, qui passim per Germaniam fataliter ea tempestate conspirabant, ad quos Dux profecturus cumque illis foedus percussurus erat. Ego igitur bona impetrata venia Tigurum repetii et restibus instrumentisque restionariis bellum indixi, quod strenue gnaviterque gessi.

Dulce bellum inexpertis.6

Quoniam autem legationes peregrinationesque multum laboris et periculi habent, ad titulum militiae referri possunt. Insigniores itaque quas iussu Senatus obivi, assignabo, cum notatione saltem temporis, omissis actionibus, quae proprium librum requirunt.

Anno 1528 die 2 Ianuarii petii Bernam, electus assecla et minister Domini Zvinglii, per totam disputationem Bernensem; redii Kalendis Februarii.

Anno 1529 2 Februarii missus sum ad Feldkilch exploratum Quinque Pagorum et Ferdinandi consilia, quae illic tunc agitabantur inter eos ad Christianae civitatis perniciem.

Anno 1529 3 Septembris profectus sum ad disputationem Marpurgensem cum Domino Zvinglio. Redii 19 Octobris.

Anno 1529 die 11 Decembris missus sum legatus ad Ducem et Senatum Venetiarum, in qua profectione a duobus latronibus in Campo Brixiano (auf der Preßler Heid) circumventus. Alterum a fronte stricto gladio profligavi, alterum a tergo concitato equo evitavi. Redii 19 die Ianuarii anno 1530.

Anno 1531 die 29 Augusti legatus missus sum ad Regem Gallorum Franciscum, negotium et causam Ducis Wirtembergensis acturus apud Regem. Res prospere confecta est in Gallia undecimo die Octobris. Sed domi eodem die pugna funestissima Capellae commissa est, quando vires atque viros abstulit una dies. Redii 27 die Octobris.

5. Mox Tiguri civis

Anno 1526 die 6 Ianuarii Gundelium adii, eo tum primum tempore post meum discessum, anno 1524, die 4 Februarii factum. Matrem meam charissimam cum salutassem, ab ea multis lachrymis multisque amplexibus exceptus fui. Deinde cum ab ea digrederer 40 aureos, item paulo post, primo die Aprilis, 60 aureos accepi, quae summa facit centum aureos. Quibus ad ius civitatis emendum caeterasque res utensiles comparandas sum usus.

Primum, anno 1526, ius civitatis Tigurinae emi, decem aureis 14 Januarii; mox, in sequenti die, nempe 15 Ianuarii, iureiurando affirmavi me civem utilem frugique reipublicae praestiturum.

Secundo Tribum Restionum, quam restiones cum piscatoribus et nautis communem habent emi 12 aureis; in qua iam inde ad hunc usque diem versatus sum, honorificentissime a meis tribulibus habitus. Nam praeter choragiam et aedilitatem caeterosque huiusmodi honores tribunitios, etiam me communi totius tribus suffragio quaestura (Pfläger-Ampt) (qui honor post tribunatum summus est) decorarunt, quod nec ante me nec post me ulli contigit, qui non fuerit senatorii ordinis; quam 12 annis obivi et ultro abdicavi atque meo suffragio et institutione effeci, ut Rudolf Lochman compater meus mihi succederet. Praeterea scriba et lector in comitiis tribunitiis diu fui, donec ego mea authoritate in locum meum Dominum compatrem Ioannem Wolphium surrogarem.

Tertio instrumenta ad artificium restionarium pertinentia emi a Ioanne Lochman restione 15 aureis 8 die Februarii.

Quarto, die 23 Februarii, proposui publice restes venales bonis avibus in taberna sub aedibus zum Schnabel dictis, in portu navali.

Quinto curam domesticam administrare institui 12 die Martii in aedibus ad Lilia nuncupatis, zur Gilgen in der Nüwstatt; ex quibus postmodum 8 die Octobris commigravi ad aedes in portu navali sitas (jetz dem Thurnhüter zugeeignet), quae mihi et Amiano addictae erant communes propter professionem nostram. Ad eas, inquam, aedes commigravi cum uxore lethaliter aegrotante et cum omni suppellectile intra spatium sesquihorae. Nempe

Tota domus Codri rheda componitur una.7

Copy eines Brieffs/ so min Mannrecht sin sollt:

Ich Hanß im Holtz, der Zyt geschworner Richter und Weibel zu Rotenburg/ bekenn offentlich mit disem Brieff/ das auf Siner Date/ als ich daselbst offentlich zu Gricht saß/ an Statt und im Namen des Frommen Fürnemmen und Wysen Herren Hanß Hasen/ des Rhadts zu Lucern/ und der Zyt Vogt zu Rotenburg/ minens lieben Herren/ for mir in Gricht erschinnen ist/ der Ersam Bartlime zum Bül/ hie zu Rotenburg wonende/ und ließ durch sin erlaupten Fürsprechen in Recht offnen. Nach dem und dann Sin Bruder Rudolff zum Bül/ jetzmal zu Zürich wonende/ vergangens Zyts hie hinnen gescheiden sige Syner Geschäfften und Fürnemmens halb/ und aber villicht/ demselben sinem Bruder Rudolffen/ etwas Fürzugs geschehen/ uff die Meinung/ das er von hinnen von Rotenburg mit Uneeren und mit keinem Glimpff nach Fug gescheiden sin sölle/ das sich doch nimmermehr erfinden mög; Begärt er uff uns an als geschwornen Richter und Urtelsprächer/ mit sampt anderen vill frommer Amptsleuten von Rotenburg/ das Wir im Kundtschafft der Warheit durch der Gerechtigkeit willen mittheilen und gäben wöltend.

Und so man Kundtschafft der Warheit niemandt zuversagen/ sunder das Recht zufürderen sich gebürt/ So haben Wir verhört/ gmeinlich fill Frumer Etlicher Amptsleuth/ und wir geschwornen Weibel Richter und Fürsprecher/ des all gut Wüssen tragen/ das obgenanter Rudolff zum Bül/ hie hinnen von Rotenburg/ Frumklich und Erlich gescheiden ist / und mit keinen Uneeren/ Argem nach Unglimpff jenen verlümdet/ und Er und sin Bruder Bartlimee/ und all ir Fründtschafft von je Wälten har by uns für frum/ biderb Leuth geschetzt und geachtet: Diser Kundtschafft und Urtheil/ so mit gschwornen Eiden bestätet/ begärt Barthlimee zum Bül eines Urkundes/ das im mit Rächt zegäben erkent ward/ under des obgemelten minens Herren Vogts von Rotenburg uffgedruktem Insigel/ Ime und sinen Erben ohne Schaden/ uff Mitwuchen vor des heiligen Creutzes Tag zu Herpst/ nach der Geburt Christi gezelt Fünfzehen Hundert Zwentzig und Fünf Jahr/ und warend hieby Gezügen Uli Sigerist/ Hans Graser/ Heini Hiltbrand/ und Rutschman zum Bül/ alle der Zyt des Grichts zu Rotenburg geschwornen Fürsprechen/ und ander genug/ etc.

Erklärung des Brieffs und Handels.

Als ich von minen Gnädigen Herren von Zürich das Burgrecht zekauffen willen was/ schreib ich minem Bruder Bartlimee/ Er sölte mir vor dem Gricht zu Rotenburg min Mannrecht erwerben und zuschicken/ da verstund er min Meinung nit recht/ vermeint ich werde zu Zürich an minen Eeren geschulten/ und erlanget von eim Gricht zu Rotenburg disen forgeschribnen Brieff/ welicher anfangt:

Ich Hans im Holz/ etc. Als ich nun um das Burgrecht bat/ leit ich disen Brieff for minen Gnädigen Herren/ an Statt eines Mannrechts / welchen Sie (mine Gnädigen Herren) für gut uffnamend/ als wäre er ein recht geförmt Mannrecht/ liessend mir durch Herren Underschreiber Junker Burkhard Wirtzen sagen/ Si (mine Gnadige Herren) werind wol zufriden/ und wöltend mir das Burgrecht gern gaben han/ wann ich schon kein Brieff ingleit hätte. Also gab ich Zehen Gulden Herren Seckelmeister/ M. Jacob Werdmüler/ und schreib mich Herr Underschreiber in das Burgerbuch mit Nammen Rudolff zum Bül/ laß mir den Burger-Eid vor/ (wiewol ich jetzunder genempt wird Collinus, oder Rudolff am Bül/) gab mir ein Brieffli an mine Meister zu den Schiffleuten/ welche mir ir Zunfft zekauffen gabend/ wie forgemelt/ etc.

6. Deinde professor eram

Professor Graecae linguae ordinarie constitutus sum a D(ominis) Scolarchis tam senatoriis quam ecclesiasticis, et deinceps a senatu Tigurino confirmatus, Dominis Zwinglio et Amiano causam interea communi studio agentibus, me plane inscio nec tale quicquam cogitante, nedum ambiente, sed inter restes et stipulas et pulverem canabinum versante. Quare vix certum tempus assignare possum; id tamen ex annalibus Collegii et Reformationis historia certo cognosci poterit.

Cum stipendium pertenue esset, literas et restes simul tractare cogebar toto triennio. Atque restionatus (das Seilerwerk, ut novum fingam in mea arte vocabulum) pulchre mihi procedebat. Tres enim habebam tabernas: Tiguri unam, meam scilicet; alteram Wesenii, quam Jos Hartman ibidem restio; tertiam Walenstadii, quam Hans Wildhaber ibidem pistor meo nomine procurabat. Postea aucto stipendio restibus valere iussis, literis incubui solis et provintiae, ut spero, meae satisfeci κατὰ τὴν δύναμιν.

Anno 1526 die 8. Augusti incepi Homerum interpretari lectione ordinaria. Quos deinceps authores quove singulos tempore interpretatus sim, enumerare nequeo, nec enim numero comprendere refert.

7.

Nunc quoque in extremis qualis mecumque manet Sors.

Sors haec in manibus stat, Deus alme, tuis.

In Psalmo 30 scriptum est:

Ἐν ταῖς χερσί σου

οἱ κλῆροι μου.

Quae sententia multis annis mea fuit tessera; eam ego iam olim ita reddidi:

Me tibi commendo, tu curam suscipe pro me.

In manibus mea sors est, Deus alme, tuis.

Amen

1576, Kalendis Januariis.

Rodolphus Collinus pater posteris suis

Ibo ego dormitum nostris cum patribus. Ibo.

In Domino Ihesu stat mea sola quies.

Ibo ego; vos chari pueri charique nepotes,

Este boni | vobis: | civibus: | et patriae: |

| invicem | Tigurinis | Helvetiae |