Sic, Iosia, boni numinis alite,        

Te dedis teneris victus amoribus?

Lecti sic obiens munia comparis,

Consuesces fieri pater?

Felix quem placido lumine conspicit

5

Non aversus amor, cui dea Cypria

Aequis dat pariter fervere flammulis,

Non praeter solitum potens.

Felix es nimium, cui socer obtigit

Bullingerus, abhinc notus adusque vir

10

Terrarumque sinus et maris ultimos,             

Qua sol surgit et occidit.                                

Thesauris Arabum sorte beatior

Idem sed tamen es atque opulentior,             

In cuius thalamum iam datur et sinum

15

Exoptata puellula.

Quam mater monitis imbuit optimis              

Formavitque piis sedula moribus,

Perfectamque dedit, pectore Palladi,             

Susannae similem fide. 

20

Non est quod timeas esse decentius

Illa, non aliquid pulchrius, orbita                              

Qua Lunae vaga, qua Cynthius ambulat,

Infra aut Oceanum supra.

Nuptam tolle tuam moxque iugalia                   

25

Lecti iura doce moxque parentium

Leges, atque vices coniugii pares,

Multis non sine liberis.

Sic vos unanimes nodus aheneus,

Sic irrupta duos copula vinciat;

30

Vestrae sic memorem stirpis originem

Vobis orta parentibus

Servet progenies tarda nepotibus.

Haec oro. Deus at mox precibus meis

(Namque is vota bonos ducit ad exitus)

35

Addet supplicibus fidem.

Crebrescunt Zephyri tepentis aurae   

Nec iam prata gelu rigent acuto,

Sed terrae violas ferunt solutae                     

Et gemmante sinum colore pingunt.

In sylvis volucres queruntur altis,

5

Argutis nemorum comis susurrans

Lympha rivulus obstrepit sonante.

Has tu delitias, amice, solus

Gustas? O tua ter quaterque felix

Vita, qui procul urbis a tumultu

10

Sylvas inter et optimos libellos         

Manes imperiosa iura fati.

O nunc unanimi tuo sodali     

Bigae Triptolemi citae darentur,

Ad villam cupide tuam volaret. 

15

Si vultum velut exprimunt colores,

Sic et, Frisi, bonas tui referrent

Dotes pectoris elegantiamque                                                

Morum, tres Charites daret tabella                                        

Uno tergeminas in ore pictas. 

5

Invidiae morsus et acerbae spicula linguae

Vincere non valeo, caetera victor eram.

Curia de curis si dicitur, omina rebus

Conveniunt: Curis Curia plena malis.