Petro Gölino Glareanus s. d.1

Extremum hunc Arethusa mihi concede laborem,

Pauca meo Petro.2

Lubet Vergiliano carmine te alloqui, virum mei amantissimum. Integram Iliada, quod tibi scriberem, haberem, sed impedit me invisa oculorum imbecillitas, ut magno nisu vix haec pauca potuerim. Nominis tui inter tot annos omnino oblitus sum, Thrasiclii3 non item, agnosco enim foetum meum.

Vitae meae rationem tibi scriberem sed conantem deficiunt vires, nempe ob oculorum miseriam, alioquin satis foeliciter dego. Ago nunc 72 annum. Natus enim sum anno Domini 1488 mense Iunio. Fere a duobus annis nunc tussi adeo vehementer vexor, ut aliquando de vita desperem, alioqui nulli morbo, Deo sit gratia, obnoxius. Lectiones ternas ac saepe quaternas in diem lego; quod saxum verso;4 nunc in 50 perpetuo legi, concessa ab eiusdem clementia perpetua sanitate.

Anno enim 1510 coepi Aeneida ac Georgica praelegere Agrippinae. Ibi orta seditione adversus Reuchlin innocentissimum virum, concessi Basileam,5 ubi contigit mihi praeceptor Erasmus Roterodamus. Mox Lutetiam Parisiorum veni. Doctorum hominum notitiam nactus, uberrimam Basileam regressus, ut putabam, in tutum portum. At ibi Schlampadius ita adornaverat urbem, ut mihi manendum esse non censerem. Concessi igitur Friburgum, ubi nunc 32 annum ago, ac e merito iam stipendio vivo, ad nullam enim praelectionem adstringor, concedente hoc liberaliter universitate. Domi tamen meae lego iuvenibus aliquot nobilibus qui mecum esse omnino volunt, cum alibi lautius fortassis degerent. Hic habes aliquid de vitae meae miseria.

Tuae foelicitati gratulor, quod dignissimo officio fungeris. Quid enim dignius, quam Christi ovili praeesse, et in vinea Domini dignos parare racemos? Hoc tibi persuadeas velim te mihi ex animo charum esse, et me paratum esse morem tibi gerere in omnibus honestis rebus. Erimus simul in coelesti patria, et bene spero. Nam hic nihil sperandum dan angst, unnd nodt, biss in den todt. Sit haec epistola mea tibi tanquam μνημόσυνον antiquae nostrae familiaritatis. Bene vale. Pluribus aegre possum. Tu nostri memor haec boni consule. Friburgi Brisgoiae anno salutis 1560 calen. Novembribus.6

Adresse: Integerrimo viro, D. Petro Gölino, sacrae religionis praesbytero, pastori in Wölshingen dignissimo, amico nostro ex animo dilecto.