In imagines depictas impensis Christophori Halesii Angli Anno 1550
Édition (Latin)
Édition: David Amherdt/Kevin Bovier/Clemens Schlip
Huldrychus Zvinglius | |
Ut Christo et patriae vixit, sic fortiter uno | |
Pro Christo et patria Zvinglius occubuit. | |
Ingenium libri, pietatem vita probarunt. | |
Mors tanto Christi milite digna fuit. | |
Joan. Oecolampad. | |
In Domini quondam fulsi lux splendida templo, | |
Cum tali vultu conspiciendus eram. | |
Si veluti vultus potuissent pectora pingi, | |
Starem doctrinae cum pietate typus. | |
Con. Pellicanus | |
Bis septem lustris vixi et tres insuper annos; | |
Vatidico quare cum Simeone precor: | |
Nunc dimitte Deus servum; tenebrosa perire | |
Vidimus et Christi regna redire tui. | |
Heinr. Bullinger | |
Lustra novem numero, queis unus iungitur annus: | |
Haec aetas; formam picta tabella docet. | |
Nil ego vel formam vel vitae tempora specto, | |
Sed Christum, vitae qui mihi forma meae est. | |
Rod. Gvaltherus | |
Unus ter denis mihi iam superadditur annus. | |
Tempora cur vitae metior ipse meae? | |
Vita Dei donum est, quae dici vita meretur | |
Si soli Christo vivere cura siet. | |
Theodorus Bibliander | |
Ex libris nomen, libri mea magna voluptas | |
Qui summi tradunt iura colenda Dei. | |
Vixi lustra novem: vitae quodcumque relictum est, | |
Omne sibi Christus vendicet atque libri. | |
Apparatus fontium
Huldrychus Zvinglius, 4: 2 Tim 2,3, Labora sicut bonus miles Christi.
Con. Pellicanus, 3-4: Lc 2,29-32, Nunc dimittis servum tuum, Domine, secundum verbum tuum in pace, quia viderunt oculi mei salutare tuum, quod parasti ante faciem populorum: lumen ad revelationem gentium et gloriam plebis tui Israhel.
Apparatus marginalium
Con. Pellicanus, 3 vel: Nunc dimitte in pace Deus, tenebrosa etc.
Heinr Bullinger,1, marg. dext.: Anno 1559 Undecimi iam nunc labuntur sydera lustri. ‖ marg. sinist.: 1561 Alter ab undecimo lustro mihi labitur annus. Infra: 1564 Bis sex lustra mihi decurrens vita peregit.
Rod. Gvaltherus, 1, marg. dext.: Anno 1559 Octavi numero properantia sydera lustri. Infra: 1561 Ego iam numero post octo lustra secundos.
Rod. Gvaltherus, 3, marg. dext.: Vel vita vita hominum brevis est etc. ‖ marg. sinist.: 1564 Lustra novem numero properantis tempora vitae / Cur spatium vitae etc.
Theodorus Bibliander, 3-4, marg. dext.: Anno 1559 Lustra decem vixi, tum quattuor insuper annos. / Quod superest, Christus vendicet atque libri.
Theodorus Bibliander, 3, marg. sinist.: 1561 Lustra decem vixi, sextus quibus additur annus.