Cernis ut e centro vireat monocaule tryphyllon, | |
Cuius stella micans cingit utrinque latus. | |
Omen inesse reor: viret huius principis aevum, | |
Principe quo virtus religioque viret. | |
Spem, viror ille, animi nutrit, fovet, educat, auget, | 5 |
Quam princeps condit pectore sub tacito. | |
Cur stellae irradiant duplices ensemque pedumque? | |
Indigitant caeli munus ab arce dari. | |
Cur tibi terna virent folia uno a caule? Sacratae | |
Symbolon est triadi. Symbolon istud ama. | 10 |
Haud vane, o Vallesiadum clarissime princeps, | |
Numine sub trino sceptra dicata reges. | |
Si tibi cum triade est coniunctum symbolon, ergo | |
Advigila sub quo Praesule praesul agas. | |
En tibi turritam Divini Pneumatis aedem | |
Rupis in excelso vertice conspicuam | |
Quam Deus ipse manu fulcit, quam protegit idem | |
Deucalion ne se naufraga mergat aquis. | |
Hic mons ille Thabor, quem Christus lumine vestit, | 5 |
Evolvens famulis caelica sensa piis. | |
Hic sacra membrorum compages Christi et avitum | |
Iustorum, haud vano nomine, concilium. | |
Huc mentem, huc oculos vestros convertite, quotquot | |
Passim mens dubios irrequieta rotat. | 10 |
Namque unus Deus, una fides, baptismatis una hic | |
Sanctio, christiadum spes, timor, unus amor. | |
Hic iubar haud modii sub tegmine fulget, aperto | |
Vultu ast Zacharidae: vox sonat alta Deum. | |
Unde ferox Babylon furiis succensa, Gigantum | 15 |
More, domum caveas ne populere Dei | |
Namque sedet statque ipse poli terraeque monarcha | |
Pro iustis, tolli nec sibi sacra sinit. | |
Dividitur in septem conventus terra Valesi. | |
Quilibet hos fasces et sua signa refert: | |
SE geminum sidus, SIR Phoebum, LEUCA gryphumque. | |
Fert vites botro RAR bicolore duas, | |
VESPIA sed binos arrecta fronte leones. | 5 |
Fert BRIGA serpentem, GOMSIA fertque cruces. | |
Sed quid stella? Paean? Gryphus? Quid vitis? Et audax | |
Quid leo? quid serpens? cruxque gemella volunt? | |
Lucifer aurorae, occasus iubar Hesperus, omnes | |
Exsuperant ignes aethereasque faces, | |
Et velut ille diem lucis dux praevius affert, | |
Sic fauste coeptum terminat iste diem. | |
Scilicet indigenis, cingit quos Rodanus alveo | 5 |
Consilii praefers iustitiaeque faces. | |
Quot radios spargit caelesti lucifer orbe | |
Tot patriam laudum dotibus irradias. | |
Quonam, Phoebe, iacis radios? Sine fraude doloque | |
Sirriadas claro lumine clarus orbis. | |
Nam velut exorti Titanos lumine, crassa | |
Nox abit et tellus luce refusa nitet, | |
Sic splendore tuae virtutis tabida noctis | 5 |
Monstra intenderunt frausque dolusque fugam. | |
Lucis amans gens es, noctem tenebrasque perosa, | |
Lux es amica bonis, lux inimica malis. | |
| |
Quid, gryphe, stas? fortes mea virtus arguit. At cur | |
Parte priore aquila es, posteriore leo? | |
Polleo mente, valens idem sum corpore, namque | |
Virtus Leucensis celsius ire nequit. | |
Illa aquilae similis se tollit ad ardua mente, | 5 |
Ad Martem pectus forte leonis habet. | |
Cur ensem praefert? Etenim stant iura Senatus | |
Integra. Cur nudus? Promptus ad arma feror. | |
Hos animare tibi voluit Lysippus in aere | |
Robustosque toga militiaque viros. | 10 |
| |
Ut vitis sese tollit per mutua nexa | |
Altius illa quidem, quo mage iuncta manet, | |
Sic quoque ad immensum surgit Respublica culmen, | |
Virtutum concors quam bene iungit amor. | |
Hoc mihi perpetuum, concordi ut pace virescam, | 5 |
Publica res odiis nam male sarta, ruit. | |
Hinc quod ego a Christo viva radice vigorem | |
Concipio, tantis uber abundo botris. | |
Magnanimos cernis crispata fronte leones, | |
Quadrupedum prima nobilitate duces? | |
Ut vigili exacuunt prospectu lumina, ne qua | |
Armorum clades exitiosa premat! | |
Pugnandum contra coniunctis viribus hostem | 5 |
Cunctaque mente prius prospicienda docent. | |
Quam vigil excubiis, quam concors pectore, promptus | |
Quam fueris semper Martis ad arma manu! | |
Hoc tua non pridem virtus testata trophaeo est, | |
Vespia, cum vidit corpora strata virum. | 10 |
Ceu Parcae parcunt, schola ut altrix otii et amens | |
Quo sibi munditiem nomine mundus habet, | |
Hoc quoque iure refers Natricis nomen, anhela | |
Gens laudum, tua sed caetera vita docet. | |
Squalens est atro natrix horrensque veneno, | 5 |
Mens tua sed nivea simplicitate nitet. | |
Copula natricum Veneris sic nexui inhaeret, | |
Alter ut alterius praesecet ore caput. | |
Tu Venerem et Veneris prolem fugis, otia spernis | |
Turpia et Alcinoi respuis illecebras. | 10 |
Ergo tu antiphrasi decoras insigna, quae cum | |
Vipera dicaris, pectus habes niveum. | |
Neptunus pelago quoties immugit, asyli | |
Sacri tunc nautis anchora iacta salo est. | |
Hanc pius amplexu delphin circumplicat, imo | |
Possit ut infigi firmius inde loco. | |
Anchora crux Christi est, quam delphin mysticus arsit | 5 |
Amplecti, mortis naufragiumque stitit. | |
Quam bene te decorat Crux alma, Gomesia, firmam | |
Quod Crucis in merito spemque fidemque loces! | |
Quippe coronis ea est nostrae colophonque salutis, | |
Non aliam laurum tempora vatis amant. | 10 |