Mortuus haud ego sum. Quid fles, matercula? Corpus

Dormit, mens summi vivit in arce poli.

In terris Foelix dicebar nomine; nunc sum

Foelix, aetherea dum fruor ambrosia.

Nec te deserui aeternum: prior alta subivi

5

Tecta Dei, aeternis tecta repleta bonis.

Illic te expecto, quo tu post laeta sequeris;

Illic me poteris, chare, videre, pater.

Illic me fratres cernent, et turba sororum,

Et quotquot Christo fidere rite solent.

10

Ducite foelices quae restant tempora vitae,

Detur ut in Christo vivere posse diu.

Assuetum vetulae limen transibat amicae

Frisius in celeri conspiciendus equo.

Iamque animo recolens veteris solamen amoris,

Raptus in hunc dubio pectore totus erat.

Sensit equus domini mentem, cupiensque placere

5

Noluit incoepta longius ire via.

Atque refragator nunc dextrum, nuncque sinistrum

In latus incertos versat in orbe pedes.

Tune tuos aliquem, Frisi, celabis amores,

Quos nimium sagax tam cito sensit equus?

10

Frisius inflati veteris sub tegmine quercus

Deponens ventris non leve pondus, ait:

Hoc ego tam certo signabo limite pratum,

Nasutus nemo tam sit ut hunc moveat.

O pater summo residens Olympo,

Qui mari et terris pelagoque saevo

Imperas, haec nunc animi precantis

Suscipe vota.

Fac tuum nomen, decus et potestas

5

Omnium sancto veneretur ore,

Moribus nostris tua fac perennis

Gloria crescat.

Fac cadat mundi rigidum minaxque,

Quo nimis pressi lachrymas rigamus,

10

Et tuum nobis meliore surgat

Tramite regnum.

Sancta sit nobis tua fac voluntas,

Sicut in caeli solet esse regno,

Ut tuas leges meditemur usque

15

Corde fideli.

Coelitus missis animas fideles

Pascito verbis, dapibusque iustis

Ut soles mundum refovere, mane et

Corpora pasce.

20

Criminum nostrum rigidus videri

Ne velis iudex, ut et nos videri

Possimus miti, facili, benigno

Pectore in hostem.

Corda tentari male firma fraude

25

Ne sinas, quaeso, rogitamus omnes.

Sed magis sancto stupidas guberna

Nomine mentes.

Libera natos Satanae cruenta

Ex manu semper, rapiat perennis

30

Ne dolor pressos nimium tremendi

Carceris aestu.

Libertatis amor, studium rectique bonique

Helvetios iunxit foedere perpetuo.

Tu, gentem defende, Deus, virtutibus auge

Hanc patriis, Christi et pacis amore fove.